Ich mecht so gärn e Hiisli z’Basel
Ohni Firlifanz und Fasel;
Im Stainegrabe und Umgääbig,
do wurd’s mr gfalle, do wär’s lääbig!

An Barfi gosch denn mit eme Sprung,
zum Minschter und zum Tinguely-Brunn;
An d’Schiffländi abe, d’Gärbergass,
dr Spaalebärg uff, in d’Freiestross!

Ins Glaibaasel wirdsch weniger go,
das iberlosch de Tirke und so;
Dr Rhysprung aber wird dr denn gfalle,
well’s kaini hett, wo ummelalle!

Jetz waisch, worum ich mecht derte sy:
Wäg dr Stadt, em People und em Rhy!

© by boelleli 01.03.94

Baasel, Du my Heimatstadt
Jo, do gfallt’s mr, do isch glatt!
Die wo di no nie hänn gseh,
die dien mr laid, das tuet weh!

Di z’beschriibe isch nid liicht,
wemme dr Rhysprung uff’ kiicht.
Wenn’d verschnuufsch, es isch eso,
bisch froh, dass z’hesch uff di gno!

D’Ussicht d’Oobe: wunderbar!
Denn isch es dir sunneklaar:
Basel isch und blibt fyr di,
d’Wunderstadt am scheene Rhy!

© by boelleli, 02.03.94

Am Barfi unde, du wirsch gseh,
hett’s immer Lyt, je lengs, je meh.
Gosch in’d Rio-Bar go luege,
muesch e Platz denn wirklig sueche!

„Kumm sitz aane“, sait denn aine
„ nimmsch e Wyy? I ha zwar kaine;
aber bstelle kaasch jo sälber,
bisch jo wohl kei Hinterwäldler!“

Kuum hoggsch aane, luegsch mol umme,
dänggsch: vo wo kenn ich dä numme?
Denn kunnt’s dr in Sinn, ohni Witz,
dä kennsch jo us em Kaffi Spitz!

© by boelleli 03.03.94

Eins isch mir bis hitt nid klaar;
Ich verstand’s nid, doch isch’s wohr:
Ziircher meege d’Basler nid,
sälber tschuld, die bleede Lyt!

Dr Basler isch sehr offe,
es isch wohr, är macht viil Sprich;
Dr Ziircher isch bedroffe,
schleppt’n fascht vor Bundesgricht!

So sait dr Basler offe:
Hösch! Sag, hesch du z’viil gsoffe?
Ich ha allewyl scho dänggt:
Ziircher sy, do hesch denn s’Gschängg!

© by boelleli, 23.03.94

Bald isch’s so wyt,
du glaubsch es nid,
wohr isch’s aber
ohni Glaber!

Was kennt’s sy?
Frogsch hyt du mi;
Du waisch es nid,
ich mach e Wett!

So sag i’s halt:
Ich wird scho bald,
es isch kei Witz,
bim kaffi Spitz

E Wohnig ha,
(au ohni Ma!)

© by boelleli, 30.03.94

Hitt schiint d’Sunne uns scheen aa,
drum gang ich zem Fährimaa;
Sag em hi und zrugg, bitte,
s’Minschter wett ich hitte gseh!

Suscht gfallts mr dert äne nid,
doch da wunderscheeni Blick,
isch halt mit nid z’vergliiche,
drum du n’ich mi beriich’re!

S’Minschter isch so wunderbar,
das isch mir jetz sunneklaar;
immer isch’s fantasitisch gsy,
s’Minschter a mym scheene Rhy!

© by boelleli, 30.03.94

„Morgestraich, vorwärts, Marsch!“
Clique, gross und large;

Vortraab, Pfiffer, Drummler,
hän drei Daag kei Kummer!

Immer hett’s viil Lyt,
doch das stört Clique nid;

Denn wenn de Fasnacht machsch,
denn pfiffsch nur no, und lachsch!

Wenn die bleed Ziircher,
aagmoolt wie ne Biircher;

Am Stroossegraabe stehen,
aber bald wieder göön!

Denn nur wenn d’Basler bisch,
verschtoosch, wie scheen das isch;

Gässle bis am Morge,
ohni d’Altagssorge!

Am Mittwuch nimmsch dr voor:
Ich gang wieder, s’nögschti Johr!

© by boelleli, 31.03.94